Græni trefillinn

Græni trefillinn er samheiti sem notað hefur verið yfir skógræktar- og útivistarsvæðin á útmörkum sveitarfélaganna sjö sem mynda höfuðborgarsvæðið. Hlutverk Græna trefilsins er að umlykja og skýla byggð og fjölþættri útivist sem fram fer á útmörkum, með fjölbreyttum skógum og ræktun, en að baki liggur einnig hugmyndafræði þar sem áhersla er á bætt umhverfi, aukin lífsgæði, bætta lýðheilsu og vatnsvernd. Segja má að Græni trefillinn sé næsti nágranni Vetrarmýrar.

Vetrarbraut
Vetrarbraut

Stígakerfi

Í skipulagi hverfisins er gert ráð fyrir fjölbreyttu kerfi göngu- og hjólastíga sem tengir Vetrarmýri við nærliggjandi útivistarsvæði. Fyrirhuguð jarðbrú yfir Reykjanesbraut mun jafnframt bæta tenginguna við miðbæ Garðabæjar verulega.

Ein af meginhugmyndum deiliskipulagsins er Vífilsstaðaás, breiður og grænn stígur með trjágöngum sem liggur frá Vífilsstöðum og upp á Hnoðraholt. Stígakerfið, ásamt nálægðinni við golfvöll og íþróttasvæði, gerir Vetrarmýri að ákjósanlegum stað fyrir virkan lífsstíl og fjölbreytta hreyfingu allt árið um kring.

Vetrarbraut

Opnir garðar

Innan íbúðarbyggðarinnar, austan Vetrarbrautar, verða opnir og samtengdir garðar sem mynda samfellda gönguleið um hverfið og tengjast við önnur almenningsrými. Vetrarbraut er megingata hverfisins og liggur í gegnum hverfið frá norðri til suðurs.
Vestan Vetrarbrautar verða einnig græn garðsvæði sem tengjast með grænu bandi sem liggur á milli húsanna og endar við opið svæði umhverfis settjörn í norðurhluta hverfisins. Með þessu verður til notalegt og grænt umhverfi þar sem íbúar og gestir geta gengið á milli ólíkra svæða og garða til þess að njóta alls sem hverfið hefur upp á að bjóða.

Leik- og útivistarsvæði

Leiksvæði verða innan lóða fjölbýlishúsanna og fjölbreytt útivistarsvæði fléttast inn í hverfið. Búðakinn verður stórt, grænt svæði sem verður einskonar hverfisgarður sem tengist beint jarðbrúnni yfir Reykjanesbraut. Sú tenging mun gera greiðari leið fyrir  gangandi og hjólandi vegfarendur yfir í önnur hverfi Garðabæjar.

Garðarnir, leiksvæðin og önnur opin svæði eru hugsuð sem aðlaðandi dvalarstaðir með fjölbreyttum möguleikum til leiks, útivistar og samveru fyrir íbúa og gesti.

Vetrarbraut
Vetrarbraut

Golf í bakgarðinum

Við Vetrarbraut er golfvöllurinn svo gott sem í bakgarðinum og því stutt fyrir golfáhugafólk að halda út á völl. Golfklúbbur Kópavogs og Garðabæjar, GKG, býður upp á öflugt félagsstarf og golfkennslu fyrir ólíka aldurshópa og getustig. Í félagsheimilinu eru einnig golfhermar sem gera kylfingum kleift að æfa og spila yfir vetrarmánuðina.