Nýtt hverfi á besta stað
Vetrarmýri er nýtt og spennandi hverfi sem rís á góðum stað í Garðabæ. Uppbygging svæðisins hófst um mitt ár 2023 og er staðsetningin einstaklega góð, í nálægð við Vífilsstaði, golfvöll GKG, útivistarsvæði Heiðmerkur og íþróttamiðstöðina Miðgarð.
Vistvænar lausnir eru órjúfanlegur hluti af hönnun hins nýja hverfis og er skipulag svæðisins umhverfisvottað af alþjóðlega vistvottunarfyrirtækinu BREEAM Communities í Bretlandi, en strangar kröfur liggja að baki slíkri vottun.
Í hverfinu mun verða byggður grunnskóli og þá eru fyrirhugaðar breytingar á deiliskipulagi svæðisins þar sem matvöruverslun verður í göngufæri.
Gildandi deiliskipulag má kynna sér hér en þá er einnig hægt að skoða þær breytingartillögur sem liggja fyrir hér.
Garðabær – samfélag með trausta innviði
Garðabær hefur undanfarin ár komið vel út í viðhorfskönnunum Gallup meðal íbúa sveitafélaganna á höfuðborgarsvæðinu. Fjöldi leikskóla er í bæjarfélaginu ásamt grunnskólum og þá eru einnig fjölbrautaskóli og tónlistarskóli í nágrenninu.
Stutt er út á Reykjanesbrautina og Kringlumýrarbrautin er hinu megin við hæðina.
Hverfið er nærri aðalverslunarkjörnum höfðuðborgarsvæðisins, steinsnar frá er Smáralindin og stutt í Kauptún með fjölda verslana og þjónustu. Garðbæingar halda samt gjarnan tryggð við sinn litla verslunarkjarna að Garðatorgi þar sem er úrval verslana og þjónustu.
Nálægðin við golfvöllinn og vinsæl útivistarsvæði
Byggingarland Vetrarmýrar er einstakt. Nálægðin við golfvöllinn og vinsæl útivistarsvæði á borð við Heiðmörk, Vífilsstaðahæð og Vífilsstaðavatn gerir hverfið að ákjósanlegum stað fyrir virkan og heilsusamlegan lífsstíl. Fjölbreyttir göngu- og hjólastígar tengja hverfið við þessi svæði og nærliggjandi byggð, auk þess sem nýtt íþróttahús og íþróttasvæði Stjörnunnar eru í næsta nágrenni.
Menningarbærinn Garðabær
Garðabær býður upp á fjölbreytt menningar- og mannlíf allt árið um kring. Á hverju vori breytist Garðatorg í Jazzþorpið þar sem gestir geta notið lifandi tónlistar, fræðslu og notalegrar stemningar. Aðgangur að hátíðinni er ókeypis og dagskráin höfðar til fólks á öllum aldri. Meðal annarra árlegra viðburða má nefna Kvennahlaupið, Jónsmessugleði og fjölbreyttar bæjarhátíðir.
Bærinn leggur jafnframt áherslu á fjölbreytta afþreyingu og menningarstarfsemi fyrir íbúa. Bókasafn Garðabæjar stendur fyrir fjölda viðburða ár hvert, þar á meðal fræðsluerindum, sögugöngum, skapandi starfi og dagskrá fyrir börn og fjölskyldur. Á Garðatorgi er einnig að finna Hönnunarsafn Íslands, þar sem íslensk hönnun og arkitektúr eru í aðalhlutverki. Saman skapa söfnin, viðburðirnir og öflugt félags- og íþróttastarf líflegt bæjarfélag þar sem auðvelt er að finna sér eitthvað við hæfi.
